2022 жылы 13 желтоқсан күні Ыстанбұл қаласында Алматы қаласы музейлер бірлестігі және ҚР Ыстанбұлдағы Бас консулы бірлесіп ұйымдастыруымен «Дала дауысы» атты халықаралық көрменің ашылуы өтті – деп хабарлайды «Арман» АКО.
Қазақстан Республикасы мен Түркия Республикасының арасында дипломатиялық қарым-қатынас орнағанына 30 жыл толуына, сонымен қатар, Тәуелсіздік күніне арналған көрмеде Ықылас атындағы халық музыкалық аспаптар музейі қорындағы бірегей, құнды жәдігерлер Ыстанбұл жұртшылығы назарына ұсынылды.
Көрменің ашылу салтанатында ҚР Ыстанбұл қаласындағы Бас консулы Әлім Дәуренұлы Байел, Бақыргөй ауданы Мәдениет департаментінің директоры Асуман Айдоғмуш, Қазақстан мәдениет және сауда орталығы төрағасының орынбасары Ержан Уәйіс және Алматы қаласы музейлер бірлестігі директоры Сағындықова Ляззат Құдайбергенқызы жылы лебіздерімен бөлісті. Көрмеге Ыстанбұл тұрғындар мен қандастармыз, кәсіпкерлер мен студенттер қатысты.
Көрмеге қазақтың көне музыкалық аспаптарының арасында күй атасы Құрманғазының, бас шайыр Абай хакімнің, жыр алыбы Жамбылдың, Ақан серінің, дауылпаз күйші Нұрғисаның жеке домбыраларының және қобыздың атасы Қорқыттың, Ықыластың тарихи қобыздарының көшірмелері қойылған. Міне, нағыз ұлттық өнердің жауһарлары. Көрермендер тарихи жадігерлермен танысып, ұлттық өнермен сусындады.
«Арман» АКО